I år feirar arrangementet heile 20 år, og dette blir markert med ein stor utebursdag full av leik, aktivitetar, natursti og gode naturopplevingar over heile landet.
Vi som brukar Kulturminnesøk er gjerne både turglade og nysgjerrige på historia i landskapet rundt oss – no har vi ei gyllen moglegheit til å kombinere begge delar!
Utebursdag og friluftsglede for alle
Kom deg ut‑dagen er ein lågterskel turdag for store og små. DNT ventar over 40 000 deltakarar og meir enn 150 arrangement rundt om i landet.
Frivillige legg til rette for naturstiar, leik, bålkos, enkle uteaktivitetar og møter med andre turglade menneske. Målet er å vise kor lett det er å oppleve naturen i nærmiljøet, uansett erfaring og form.
Du finn oversikt over alle arrangement i DNT si aktivitetskalender.
Kulturminnesøk som turfølgje
Med Kulturminnesøk på mobilen kan du enkelt kombinere turen med kulturhistorie. I kartet kan du sjå kulturminne og kulturmiljø i området du ferdast filtrere på til dømes arkeologiske lokalitetar og finne spennande spor frå fortida som ligg tett på dagens turstiar
Kartet fungerer godt ute i terrenget, og med brukarkonto kan du også leggje inn eigne bilete til kulturminne du besøker.
På biletet over ser du til dømes Uvdal stavkyrkje. Kanskje du finn eit kulturminne du vil leggje til bilete av, eller kanskje du finn eit eige brukarminne som du vil registrere?
Bidra med informasjon
Alle kan bidra med informasjon om kulturminne i Kulturminnesøk – og det er enkelt!
Slik gjer du det: Har du informasjon om kulturminna i Kulturminnesøk, eller kjenner du til kulturminne som ikkje er registrerte?
Då kan du bidra ved å leggje inn kulturminne i kartet med ei skildring og laste opp bilete. Du kan òg leggje til kommentarar og bilete til kulturminne som allereie er registrerte.
Her finn du meir informasjon om korleis du brukar Kulturminnesøk.
Feir 20 år med turglede
I år markerer DNT 20‑årsjubileet til Kom deg ut‑dagen med utebursdagar over heile landet, og arrangementa er – som alltid – gratis og opne for alle.
Ta med ein termos, gode klede og gjerne ein venn – og bli med på årets store turfest i nærnaturen!
God tur!